tampo queen

Sya ay kasing edad ng nanay ko.

1. Seksi manamit
2. Maganda ngumiti
3. Nakaka aliw kausap
4. Parang nanay na rin ang turing ko sa kanya
5. May 4 na anak panay pasaway
6. Asawa ng pulis

Ang dami namin masasayang araw, at masasabi kong napalapit din ang loob ko sa kanya kahit:

1. Umagang umaga pa lang nag mumura na yan ng pagkalakas lakas na halos mabasag ang eardrum mo . ( human alarm clock ko)
2. Diretsa mag salita, walang preno kahit nakakasakit basta sasabihin nya ang gusto nya.
3. Ginugulangan ako sa upa ng boarding house ko, pinababayaran sa akin ang tubig at ilaw eh bed spacer lang naman ako. (binabayaran ko pa rin kasi pakisama ba.)
4. Pag may nakitulog na kaibigan ko o malapit na kamag anak gusto pabayaran yun pag stay ng tao kahit isang araw lang.
5. Doble doble ang singil pang nangutang ka sa tindahan nya, nadodoble nya kasi ang kinuha ko, mantakin mong makaka consume ka ba ng 12 peices na sachet ng conditioner sa isang linggo lang?? .( hindi ka mananalo sa diskusyon.. kaya babayaran ko na rin ulet)
6. Tsismosa numero uno..
7. Kahit na palaging maingay dun inaabot ng madaling araw may kumakanta sa videokehan nya.
8. Inuman hanggang madaling araw kasama ang mga kababayan nyang bisaya .

Kaya ko pang tiisin lahat ng iyan sa pagtira ko sa boarding house kong mahal kahit ganyan sya.. ang hindi ko lang matanggap yun nangyari kamakailan … ewan ko lang kung pag iinarte ba ito.. ganito kasi yun..

Nagtae ako last week.. ewan ko ba kung ano nakain ko at tinamaan ako nag sakit ni haydol JC. Anim na beses yata ko pabalik balik ng CR nung gabing yun okey sana kung umaga ang kaso gabi kaya puyat ang katapat ko.

Ang bilis makapanghina, hanggang umaga nagtatae pa din ako kaya uminom nako ng gamot, sabi ng bebeko uminom daw ako ng gatorade at kumain ng mansanas at saging tapos mag pahinga para bumalik ang lakas ko. So sinunod ko naman sya dahil hinang hina talaga ako, after office hours bumili na ko ng gamot.

Eto ang siste.. Masarap sana matulog na dahil puyat talaga ako.. anak ng pitong ipis .. ang lakas ng kantahan sa videoke hanggang ala una yata yun, buti sana kung kantahan lang, aba naman may kasama pang sigaw.

Kamusta naman yun may studyante akong kasama sa bhauz ko, bilang concern housemate nagtext ako sabi ko:

” tita maingay po, pakisaway naman po, kasi ang ingay nagsisigawan pa, may trabaho pa ako bukas at may mga studyante pa dito mag eexam bukas. ” Walang reply.. natapos ang inuman, si Lambing puyat.

Nakareceive ako ng text kinaumagahan…

” Sino to? Hanap ka nalang ng boarding mo, di ko kayang pigilan mga anak ko…”

Wala kong load kaya di ako nakapagreply… sabi ko sa isip ko nakuu tong si tita oo, baka akala nya iba ang nag text kaya ganon ang sagot, pero medyo nakakainit na ng ulo ang sagot nya ha..

Tita ako yun nag text… sabi ko nung namasyal sa opisina ko.. ganon pa din ang sagot..” Di kung di ka makatiis humanap ka nalang ng boarding mo, di ko kayang pigilan mga anak ko.. ( iritadong sagot na pasigaw).

Hindi maganda sa pandinig lalo na at sumisigaw.. ang sabi ko hindi po dapat ganon ang sagot mo… ( hindi ako makasingit kasi dire diretso talaga bunganga nun parang armalite lang. . kung pwede ko lang sana sungalngalin yun bunganga nya para matigil eh.. pero syempre di ko magagawa yun.) Dahil hindi ko makausap ng maayos at nagtatalak.. at yun sungay ko e lumalabas na… k fine! Bago pa tuluyan lumabas ang sungay ko at mabastos ko sya…

HAYAAN NYO PO!  AALIS NA AKO!!!

Tapos ang usapan, alsa balutan ang Lambing agad , nag halfday ako, kahit marami akong pinanghihiyanayangan sa pag alis. Aalis na lang ako. Nabastos na ako. Di ko kaya yun ganon. Kaya eto kahit nakikita ko sya sa labas ng opisina kasi malapit lang talaga yun dating bhauz ko sa office ko 50 steps away lang. Wala pa ko sa mood pansinin sya. Ayaw ko na syang Lambingin.. nagiinit pa ang ulo ko sa kanya!

It hurts you know!

Mga kalambingan kung ako ikaw ano gagawin mo???

PA RAFFLE

Dito sa pilipinas talaga uso ang raffle . Ibat -ibang mechanics ang ginagamit, ibat-iba ding motive kung bakit nag paparaffle. Sa mga supermarket nag paparaffle sila para lumakas ang kita nila . Yun iba naman nag papa raffle para makakuha ng donation para sa pangangailangan ng simbahan at kung ano ano pang dahilan .

Dito sa aming maliit na subdivison ay may nangyayari rin paraffle. Gawa ng madalang kong pag uwi sa amin di ko na halos kilala ang mga bagong home owners ng aming subdivision, pwera nalang yun mga matatandang malapit sa amin. Nakaka miss sa aming subdivision kasi doon ko na enjoy ang pagkabata ko.

Natatandaan ko pa habang nag mamadyong ang aking nanay sa aming kapitbahay panay ang pabili ko ng chocolait ito yun milk chocoleyt na iniinom saka mga kendi at kung ano ano pa di naman maka angal si nanay gawa ng andyan ang mga kamadyongan nya at di sya pwede umangal dahil magsusumbong ako sa aking tatay kaya bigay hilig si nanay sa gusto ni Lambing. Pero natapos na lahat nang mga ala ala ko sa dati naming subdivision ng maghiwalay na ang aking ama’t ina.

Bago magtapos ang taon bumisita ako sa aming subdivision kasi dun pa rin nakatira si fadir kaibahan nga lang iba na ang nakatira sa bahay di na ang nanay ko. Tuwing matatapos kasi ang taon naka ugalian ng homeowners association namin na magkaroon ng CHRISMAS PARTY.

So naka tanggap si sharon ( madrasta ko) ng invitation galing sa homeowners para sa christmas party. Gawa ng busy ang sharon at gabby (fadir ko) ako ang pinag attend ng party kasi may raffle daw at bigatin ang mga prizes.. hindi ibibigay kapag nabunot ka tapos wala ka dun. Kahit ang lakas ng ulan umattend ako kasi sayang din yung mga prize.. at dadating pa daw si Ginoong politiko ni tao ni PGMA sa malacanang taga sa amin kasi sya mamimigay ng sabong pampaputi at mga sako sakong bigas , groceries, at payong etc.

Nag umpisa ang program kahit kalakasan ng ulan… nagsimula ang parlor games at bunutan ng mga consolation prize. Lahat ng family naka lista sa bunutan pero napansin ko lang lahat ng opisyal ng home owners iba ang binibigay kaysa sa ordinaryong home owner.. sabi ko naman okey lang yan may mga major prizes pa naman.. Rice Cooker, Isang kaban ng rice, gas stove, coffee maker, pressure cooker etc.. At lahat ng mga prize ay na solicit nila sa munisipyo kay Gov. Grace Padaca.

Nabunot naman ang family name namin.. nagka problema dapat daw yun homeowners daw mismo ang nandun??? watta ? Ano pa ba ko?? Di ba ako anak ng tatay ko??? Halos ayaw ibigay ang premyo .. ayaw ko na nga tumayo dahil napahiya na ko, kinwestyon pa ang pagka tao ko.. hindi lang ako gaanong umuuwi dun.. haizzz at alam mo ba kung anong binigay sa akin sa nakabalot na puting papel???

DALAWANG NAKA SACHET NA TOYO YUN TIG PIPISO!

Eto pa, dumako tayo sa major prizez.. yes baka may pag asa pa.. naku naman lahat ng major prizes ang nabunot ay pangalan ng mga nandon sa harap na opisyal ng home owners.. kay doctora, kay attorney, sa asawa ng chairman, kay officer 2, officer 3. Watta??? Iba ang bunutan ng pangalan ng major prizes .

Lokohan na ito.. Panay opisyal ang nanalo at ayaw pa kaming paalisin dahil wala pa daw si G. Politiko. Ayan dumating si politiko pinakanta pa kami para mangaroling. Para daw ibigay ang hinihiling nilang donasyon sa chapel.

So habang dumadaan si G. Politiko kinamayan ko na, bumalik nakita uli ako kinamayan ako sabay sabi ang lusog natin ah.. ( sa iba nakatingin) watta???

So nag talumpati si G. Politiko, binigay ang mga regalo tapos may payong daw na may tatak na galing sa office of the president.. sabi ko sana yun nalang makuha ko kasi lakas ng ulan. Pag ka alis ng ni G. Politiko namigay na ng groceries ang mga bwiset na opisyal .. at yun payong sa kanilang mga officer nalang daw, ayun  pinag isa isa nila.

” GINAMIT PA NILA ANG IBANG TAO PARA MAKUHA NILA ANG GUSTO NILA. harap harapang panloloko.. di na sila nahiya sa balat nila..”

Naiisip ko lang kung sa munting homeowners na ngalang may lokohan nang nangyayari Paano pa kaya sa Malacanang?

lagay

Sa tinagal tagal kong pagsusulat ng entry dito sa wordpress wala pa akong naging topic tungkol sa mga seryosong bagay tulad ng nangyayari sa paligid ko. Bilang isang mamamayang Pilipino biglang kinurot ng aking konsensya na maging aware din sa paligid at mag bigay ng aking opinion sa lumalalang corruption sa bansa. Hindi ko bibigyan ng pansin yun nasa malalaking pamahalaan dahil alam ko naman na marami ng pumupuna sa mga buwaya ng lipunan.

Ako ay isang anak ng isang simpleng empleyado ng gobyerno, bilang isang anak mataas ang pagtingin ko sa aking ama. At dahil sa paghangang yun pinangarap ko din na balang araw magtrabaho sa opisina gaya ng tatay ko. Ang tatay ko ay nagtratrabaho sa gobyerno sa LTO ( Land Transportation Office).

Noong bata ako bilib ako sa kanya, hanggang ngayon naman eh, pero habang lumalaki ako, may mga naririnig ako sa paligid ko, na ang nagtatrabaho daw sa LTO ay mga buwaya. Nagtatanong ang mura kong isipan bakit kaya sila tinatawag na buwaya? Hanggang sa natuklasan ko na ang buwaya pala ay tumutukoy sa mga taong nanamantala ng kapwa, yun mga taong nangingikil ng pera o ano mang bagay sa taong naka labag ng batas. Minsan naman para mapabilis ang pag lakad ng papeles kailangan may LAGAY.

Kaya kahit di ko man nakikita na ginagawa ng aking butihing ama ang mga binibintang nila sa mga empleyado ng LTO, syempre damay ang tatay ko sa mga binibintang nila. Kaya kung tatanungin nila ako ano trabaho ng tatay ko at sasabihin kong LTO nakikita ko sa iba na meron silang ngiting nakaka insulto. Naiirita ako pag ganon ang persepsyon ng tao sa lahat ng nagtatrabaho sa LTO lalo na at ama ko yun. Ngayon malaki na ako, gusto ko pa rin magtrabaho dito pero naiisip ko kaya ang pressure dito. Hindi ko gustong matawag na buwaya, dahil kahit kelan hindi ako sang ayon sa pagsasamantala sa aking kapwa. Mukha lang wala akong walang pakialam sa paligid ko pero sa totoo lang i care po.

Kung bakit ako nakapagsulat ngayon kasi nainspire ako kanina o nainis ako sa narinig ko …

Sa opisina

CO WORKER 1 : Nahuli daw si boknoy ng LTO, kinuha yun plaka. patay nanaman sya sa babayaran nyan.

CO WORKER 2 : Ano ba ang violation? .

CO WORKER 1 : Driving without license.

CO WORKER 3: patay si boknoy kasalanan pala nya di sa kanya sisingilin ni boss yun babayaran.

CO WORKER 2 : wag kayong mag alala andyan naman si Lambing o, easy lang LTO tatay nyan.
CO WORKER 1: Sa susunod kasi na dumaan kayo pag may nakita na kayong mga buwaya sa daan hagisan nyo na agad ng sitseria ( produkto na tinitinda namin), para dina kayo hulihin sa susunod na pagdaan nyo.
CO WORKER 2 : Di masasanay naman yun, tuwing dadaan kayo hihingan na kayo nun???

Lambing : Hay naku kayo, nag rereklamo kayo sa mga mangungurakot ng bayan, sinasabi nyong buwaya sila , pero kayo din naman ang naglalagay , imbes na ituwid nyo ang pagkakamali kayo pa ang nag bubuyo sa taong mangikil. ( iiling iling)

Naalala ko pa na minsan nahuli yun truck namin, ng LTO ako pa ang kinausap ng boss ko para tubusin yun truck namin. Okey lang naman sa akin. Pero hello? Ano ba maitutulong ko dun? Kung nakalabag ka man ng batas dapat pag bayaran mo yun diba? Walang palakasan system. Dapat ganon naman talaga pero sad to say na marami talagang nag ba bribe din ng mga empleyado sa goberyno dahil gusto lagi sa mabilisan, ayaw mag hintay.

Yun iba naman nag lalagay sa titser para pumasa. Naisama ko rin ito dahil narinig ko ito sa dalawang estudyanteng nag uusap kanina. Nakakalungkot talaga kasi sabi nun kakilala ko kanina binigyan nya yun titser nya ng 500 pesos para bigyan uli sya ng case, kasi graduating na ito.

Hindi ba kung gusto natin may magbago sa lipunan natin o kung gusto nyong mawala ang corruption sa bansa dapat mag simula ito sa atin.

Nakakalungkot isipin na kahit sa mga ganitong sitwasyon, kahit saan ka pa mapunta sa malaking syudad man o liblib na pook ang form of corruption tulad ng extortion ay nagaganap, kung meron man mga taong gumagawa nito, masasabi ko lang na nakaka inis kayo, mahiya naman kayo sa balat nyo, mga mapagsamantala, at dun sa mga taong imbis na manindigan eh sila pa mismo ang nag uudyok sa tao para mangikil mas nakakainis kayo. Pinoy gumising ka!!!